Cuca é unha cadela de pelo negro moi crecho. Vive na rúa, libre coma as bolboretas ou o vento, pero tamén baleira de agarimos. O frío faise dono dos días e Cuca monta garda onda un aparcadoiro de coches. Cando chega algún, dálle igual que sexa bonito ou feo, grande ou pequeno… En canto o ruído do motor cesa, corre a meterse debaixo para aproveitar a calor que desprende. Alí adormece protexida.